अमेरिकामा कोरोना संक्रमितको संख्या एक लाख नाघ्यो, विश्वभर एकै दिन ३ हजारको मृत्यु
प्रकाशित : २०७६ चैत १५ गते ७:४९
विश्व्यापी महामारी कोरोना भाइरस अर्थात् कोभिड नाइन्टिनबाट शुक्रबार दिन ६२ हजार बढी संक्रमित भेटिएका छन्।
सबैभन्दा बढी अमेरिकामा हिजो झण्डै १७ हजार नयाँ संक्रमित भेटिए। योसँगै अमेरिकामा संक्रमित हुनेको संख्या १ लाख २ हजार पुगेको छ। यो विश्वको सबैभन्दा धेरै संख्या हो। अमेरिकामा हालसम्म ६ लाख ८५ हजार मानिसमा कोरोना परीक्षण गरिएको उपराष्ट्रपति माइक पेन्सले बताएका छन्।
इटलीमा अहिलेसम्म ८६ हजार ४ सय संक्रमित भेटिएका छन्। चीनमा ८१ हजार ३ सय ४० संक्रमित भेटिएकामा झण्डै ७५ हजार निको भइसकेका छन्। ३ हजार २ सय ९२ जनाको मृत्यु भएको छ।
कोरोना संक्रमणबाट सबैभन्दा बढी इटलीमा ९ हजार १ सय मानिसको मृत्यु भएको छ। इटलीमा कोरोना संक्रमित १ सय २ वर्षीया महिला उपचारपछि निको भएकी छन्। उत्तरी जेनोआ सहरकी ती महिला २० दिन अस्पतालमा बसेर उपचार गराएपछि निको भएकी हुन्। उनले हिजो १ सय २ वर्षको जन्मदिन मनाएकी छन्। स्पेनमा ५ हजार १ सय बढीको मृत्यु भएको छ भने संक्रमितको संख्या सबैभन्दा धेरै रहेको अमेरिकामा मृत्यु हुनेको संख्या झण्डै १ हजार ६ सय पुगेको छ।
फ्रान्समा ३२ हजार संक्रमित भेटिँदा १ हजार ९ सय भन्दा बढीको मृत्यु भएको छ। बेलायतमा मृत्यु हुनेको संख्या साढे ७ सय पुगेको छ। हिजो एकै दिन सबैभन्दा धेरै इटलीमा ९ सय १९ जनाको मृत्यु भएको छ भने स्पेनमा ७ सय ७३ जनाको मृत्यु भएको छ। यो सँगै विश्वभर हिजो ३ हजार भन्दा बढीको मृत्यु भएको छ।
Facebook Comment