कांग्रेस लुम्बिनी प्रदेशको नेतृत्व संस्थापन इतरलाई, अमरसिंह पुन विजयी

NAWALPUR TIMES
प्रकाशित : २०७८ मंसिर २० गते ९:०९
कांग्रेस लुम्बिनी प्रदेशको नेतृत्व संस्थापन इतरलाई, अमरसिंह पुन विजयी

बुटवल । नेपाली कांग्रेस लुम्बिनी प्रदेश सभापतिमा अमरसिंह पुन निर्वाचित भएका छन् । उनी संस्थापन इतरको रामचन्द्र पौडेल पक्षका नेता हुन् । आज बिहान सम्पन्न मतगणनाको अन्तिमपरिणाम अनुसार पुनले  सभापतिका अर्का प्रत्यासी संस्थापन समूहका भरतकुमार शाहलाई ८५ मतले हराएका हुन् ।

पुनले ८५२ मत पाउँदा शाहले ७६७ मत पाए । शुरुआतदेखि नै पुनले अग्रता लिँदै आएका थिए । पदाधिकारीमा पनि पुन प्यानलकै वर्चश्व रहेको छ । उपसभापतिमा भुवनप्रसाद श्रेष्ठ ८४७ र राजु खनाल ७९२ मत ल्याइ विजयी भएका छन् । खनाल भने  संस्थापन निकट मानिन्छन् । अष्टभुजा पाठकले ७७२ र सुधाकर पाण्डेले ६६१ मत ल्याएर उपसभापतिमा पराजित भए ।

महामन्त्रीमा विक्रम खनालले ८४४ र सुरेन्द्रराज आचार्यले ८३९ मत ल्याइ विजयी भएको निर्वाचन समितिले जनाएको छ । दुवैजना पौडेल निकट हुन् ।

सहमहामन्त्रीमा विष्णुप्रसाद खनाल ‘मुस्कान’ ८५९, खगराज पाण्डे ७७६ र महिला कोटामा निमा गिरी ८३० मत ल्याइ निर्वाचित भएका छन् । ती सबै पौडेल समूहकै हुन् । माया पुन ७५२, सरिता चौधरी ६८७ तथा लक्ष्मी नारायण शाह ६७६ मतसहित पराजित भएका छन् ।

शनिबार राति १२ बजेदेखि शुरु भएको मतगणना आज बिहान मात्र सकिएको हो । प्रदेश अधिवेशनमा कुल १ हजार ६३१ मत खसेको थियो । लुम्बिनी प्रदेशका १२ जिल्लामध्ये नौ जिल्ला सभापतिमा पनि पौडेल पक्षले सभापति जितेको छ ।

प्रकाशित : २०७८ मंसिर २० गते ९:०९
Copyright © 22 Integreated Media Company Pvt. ltd., All Rights Reserved.
Website by: SAROJ BHATTARAI