राईनो संरक्षण गोल्डकप : २८ बिघा क्वाटरफाइनलमा
प्रकाशित : २०८० माघ २९ गते १८:२१
कावासोती । नवलपुरको मध्यविन्दु-२ कोल्हुवाको राईनो रंगशालामा जारी राईनो संरक्षण गोल्डकप फुटबल प्रतियोगितामा अठ्ठाइस विगाहा युवा क्लब क्वार्टरफाइनलमा प्रवेश गरेको छ ।
सोमबार लुम्बिनी प्रदेशलाई ३–० गोल अन्तरले पराजित गर्दै नवलपुरकै क्लब अठ्ठाईस विगाहाले अन्तिम ८ मा स्थान सुरक्षित गरेको छ ।
सेमिफाइनल प्रवेशका लागि अब संकटा क्लब काठमाडौंसँग खेल्नेछ ।
खेलको अग्रता अठ्ठाइस विगाहाले ३४ औं मिनेटमा सुशिल लामाको गोलमा लिएको थियो । पहिलो हाफ सकिन तीन मिनेट अघि समिर राई ठोकरले टोलीको अग्रता दोब्बर बनाएका थिए । दोस्रो हाफको ५९ औं मिनेटमा निरज चौधरीले विजेता टोलीका लागि तेस्रो गोल गरे ।
कप्तान तथा गोलकिपर बिरेन्द्र सरु मगर खेलको म्यान अफ द म्याच घोषित भए ।
राईनो क्लब मध्यबिन्दु नवलपुरको आयोजनामा सञ्चालित प्रतियोगितामा १२ टिम सहभागी छन् ।
प्रतियोगिताको विजेताले उपाधिसहित नगद ८ लाख हात पार्नेछ भने उपविजेताले ४ लाख प्राप्त गर्नेछ ।
प्रतियोगिताको सर्वोत्कृष्ट खेलाडीले २० हजार रुपैयाँ प्राप्त गर्ने तथा सर्वाधिक गोलकर्ताले १० हजार र म्यान अफ द म्याच हरेक खेलमा ५ हजार रुपैयाँ प्राप्त गर्नेछन् ।
ताजा अपडेट
Facebook Comment