उखु किसानको आन्दोलन : दुई मन्त्रीसहित कांग्रेस नेता रामचन्द्र पौडेलको ऐक्यबद्धता

NAWALPUR TIMES
प्रकाशित : २०७७ पुष ३ गते १७:०४

काठमाडौं । उखु किसानको आन्दोलनलाई दुई वहालवाला मन्त्रीसहित नेपाली कांग्रेसका वरिष्ठ नेता रामचन्द्र पौडेलले ऐक्यबद्धता जनाएका छन् । आज दिउँसो माइतीघर मण्डलमा उद्योग, वाणिज्य तथा आपूर्ति लेखराज भट्ट, संघीय मामिला तथा सामान्य प्रशासनमन्त्री हृदयेश त्रिपाठी र कांग्रेस नेता पौडेल सहभागी भएका हुन् ।

केही समय धर्नामा समेत बसेका उद्योगमन्त्री भट्टले उखु किसानले पाउनुपर्ने रकम कुनै पनि हालत उपलब्ध गराउने आश्वासन दिए । उनले किसानको आन्दोलनको समर्थन जनाउँदै १५ दिनभित्र किसानले पाउनुपर्ने सबै रकम उपलब्ध गराइछाड्ने बताए ।

यस्तै नेता पौडेलले किसानको आन्दोलनमा ऐक्यबद्धता जनाउन आएको बताए । समाजवादउन्मुख राज्यमा किसानको अवस्था यही हो ? भन्दै उनले प्रश्न गरेको थिए । नेपाली कांग्रेस पनि किसानको आन्दोलनमा सँगै रहेको भन्दै नेता पौडेलले राज्य संयन्त्र हुँदाहुँदै कसरी उम्कन्छन् भन्दै दुई मन्त्रीको ध्यानाकर्षण पनि गराएका थिए । उनले किसानको बक्यौता नतिर्ने उद्योगीलाई पक्राउ गर्न पुर्जी जारी गर्ने तर नपक्रने काम सही नभएको बताए । “भाषण होइन व्यवहारमा सरकारको काम देखिनुपर्‍यो । किसान कति चिसोमा बस्छन् ?” उनले भने ।